Xətai rayonunda Xətai Rayon İcra Hakimiyyəti, Yeni Azərbaycan Partiyası Xətai rayon təşkilatı və Bakı şəhəri 2 nömrəli uşaq-gənclər inkişaf mərkəzi PHŞ-nin birgə təşkilatçılığı ilə “Konstitusiya və Suverenlik İli” çərçivəsində “31 Dekabr – Dünya Azərbaycanlılarının Həmrəyliyi Günü”nə həsr olunmuş “Vətənim Azərbaycan!” adlı rəsm müsabiqəsinin yekunu ilə əlaqədar tədbir keçirilmişdir. Müxtəlif yaş qruplarından olan məktəblilər arasında keçiriləm bu müsabiqəyə, ümumilikdə 200 rəsm əsəri təqdim etmiş, münsiflər heyəti tərəfindən 18 istedadlı şagird qalib adına layiq görülmüşdür.
Fim.az xəbər verir ki, Tədbirdə Yeni Azərbaycan Partiyası Xətai rayon təşkilatının sədri Ramil Mirzəyev, Azərbaycan Respublikası Milli Məclisinin depudatı Pərvanə Vəliyeva, Xətai rayon İcra Hakimiyyətinin şöbə müdiri Anar Tağızadə, Bakı şəhəri üzrə Təhsil İdarəsinin “Məktəbdənkənar fəaliyyətinin təşkili” sektorunun müdiri Günay Qurbanova, Azərbaycanın Xalq rəssamı Arif Hüseynov iştirak etmişdir.
Tədbir Ulu öndər Heydər Əliyevin və Azərbaycan Respublikasının ərazi bütövlüyü və suverenliyi uğrunda canlarını fəda etmiş şəhidlərimizin əziz xatirəsinin bir dəqiqəlik sükutla yad edilməsi ilə başlamış, ardınca Azərbaycan Respublikasının Dövlət Himni səsləndirilmişdir.
İlk öncə qonaqlar və iştirakçılar müsabiqə çərçivəsində şagirdlərin çəkdiyi rəsmlərdən ibarət sərgiyə baxışa dəvət olunmuş, uşaqların və yeniyetmələrin vətənpərvərlik ruhunda, milli dəyərlərə bağlılıqla hazırladıqları əsərlər böyük maraq və rəğbətlə qarşılanmışdır.
Tədbirdə çıxış edən Yeni Azərbaycan Partiyası Xətai rayon təşkilatının sədri Ramil Mirzəyev qeyd etmişdir ki, “Konstitusiya və Suverenlik İli” çərçivəsində təşkil olunan bu cür tədbirlər gənc nəslin milli şüurunun formalaşdırılması və dövlətçilik ənənələrinə hörmət ruhunda tərbiyə olunması baxımından mühüm əhəmiyyət kəsb edir. O, vurğulamışdır ki, rəsm müsabiqəsi uşaqların yaradıcılıq potensialının üzə çıxarmaqla yanaşı, onların Vətənə, dövlət rəmzlərinə və milli birlik ideyasına bağlılığını gücləndirir.
Azərbaycan Respublikası Milli Məclisinin deputatı Pərvanə Vəliyeva çıxışında Dünya Azərbaycanlılarının Həmrəyliyi Gününün tarixi və ideoloji əhəmiyyətindən bəhs edərək bildirmişdir ki, bu bayram azərbaycanlıların milli birliyinin, həmrəyliyinin və dövlətçilik düşüncəsinin rəmzidir. Deputat uşaqların rəsmlərində əks olunan Vətən sevgisinin, bayraq, torpaq və birlik motivlərinin gələcək nəsillərin vətənpərvər ruhda formalaşdığının bariz göstəricisi olduğunu qeyd etmişdir.
Xətai Rayon İcra Hakimiyyətinin şöbə müdiri Anar Tağızadə çıxışında rayon ərazisində gənclər və uşaqlar üçün keçirilən maarifləndirici və yaradıcılıq yönümlü tədbirlərin əhəmiyyətini vurğulamış, belə müsabiqələrin onların dünyagörüşünün genişlənməsinə, milli-mənəvi dəyərlərə bağlılığının möhkəmlənməsinə töhfə verdiyini bildirmişdir.
Bakı şəhəri üzrə Təhsil İdarəsinin Məktəbdənkənar fəaliyyətinin təşkili sektorunun əməkdaşı Sevda Ramazanova çıxışında məktəbdənkənar təhsil müəssisələrinin şagirdlərin istedadlarının üzə çıxarılmasında mühüm rol oynadığını qeyd etmiş, bu cür müsabiqələrin uşaqların estetik zövqünün və yaradıcılıq qabiliyyətinin inkişafına xidmət etdiyini vurğulamışdır.
Tədbirdə çıxış edən Azərbaycanın Xalq rəssamı Arif Hüseynov isə gənc rəssamların işlərini yüksək qiymətləndirərək bildirmişdir ki, uşaqların çəkdiyi rəsmlərdə milli ruh, Vətən sevgisi və güclü emosional ifadə hiss olunur. O, iştirakçıları gələcəkdə də sənətə bağlı qalmağa, yaradıcılıqlarını daim inkişaf etdirməyə çağırmışdır.
Çıxışlardan sonra Bakı şəhəri 2 nömrəli uşaq-gənclər inkişaf mərkəzi şagirdlərinin hazırladığı musiqili kompazisiya təqdim olunmuş, müsabiqənin qalibləri diplom və hədiyyələrlə təltif edilmişlər.
Xətai rayonunda “Vətənim Azərbaycan!” adlı rəsm müsabiqəsinin yekunu ilə əlaqədar tədbir keçirilmişdir
Xəbər xoşunuza gəlib? Sosial şəbəkələrdə paylaşın
Digər xəbərlər
Sizin reklam burada
Sizin reklam burada
Xəbər lenti